النهارده ركبت مترو علي غير العاده ﻷسباب تتعلق بدفع فاتورة النت ..ماعلينا يعني
المهم ركبت في عربيه السيدات كأي مواطنه عاقله تفاديا للمضايقات ..وطلعت كتاب وبدأت اقرا ..لحد كده مافيش مشاكل
جت فعدت جمبي واحده ست الكيوتنس هينط من عينيها وبدأت تبصلي بصات اشمئزاز و كل مره تبصلي فيها تقول كلام بصوت واطي ..مش عارفه دي تعاويذ ولا ايه ..
المهم ماركزتش معاها ونزلت محطة رمسيس لاقيتها نازله معايا وبتسابق الناس علي سلالم المترو زي ماتكون مستعجلة ..
وقفت شوية عند فرع TEdata ادفع الفاتورة ..وخرجت لاقيت ظابط مستنيني والمزه واقفه جمبه وبيقولي ممكن تتفضلي معانا لحظة ..قولتله خير !! قاللي مش هعطلك كتير
المهم لاقيته بيطلب مني يفتش شنطتي ..استغربت بس قولت اجاريه لحد النهاية اما اشوف اخرتها
لاقيته مطلع الكتاب وبيبص للاخت اللطيفه وبيقولها هو ده الكتاب ..بصتله بشموخ وقالتله ايوة ..
طبعا انا بدأت الضحك بطريقه هستيريه كنت قربت الم الناس اللي في المحطه عليا وسألته ايه المشكله دلوقت علشان ورايا شغل ومش فاضيه .
لاقيته بيقولي "الاستاذه بتقول عليكي انك بتقري كتاب بيدعي الناس للالحاد !!"
الكتاب بالمناسبه " ولاد حارتنا لنجيب محفوظ "
ماكنتش بصراحه عارفه ارد من كتر الضحك ..ومسكت نفسي بالعافيه علشان افهمه ان الروايه دي موجوده في كل المكتبات وعند كل الناس اللي فارشه بكتب فالشارع ومعارض الكتب وسور الازبكيه ..
لاقيت الاخت بترد عليا وبتقولي بس الازهر كفر نجيب محفوظ ..طبعا مارديتش عليها علشان كان ممكن اسبلها
سألت الظابط ..ينفع كاتب كافر زي ما لامؤاخذه طنط بتقول تبقي كتبه مغرقه السوق كده ؟! ورواياته تتعمل افلام ومسلسلات عادي ؟! ولا ناويين تقبضوا علي كل الناس .؟! الظابط ضحك ..وقاللي خلاص ممكن تتفضلي
grin رمز تعبي
طبعا الست ماعرفتش ترد وماكنش عندها حاجه تقولها ..انا بصيتلها وقولتلها انا عندي كتب الحاد بجد لو تحبي ابقي اجيبلك بس تبقي ترجعيهم ..ها!!
وبعتلها بوسه علي الهوا ومشيت
