حقيقة وضع مصر في حرب اليمن الحاليه

مصر يبدو إنها داخلة الحرب في اليمن. وطبعا ده بيستدعي ذكريات مش لطيفة.
بس الحق يتقال الفروق نوعية بين مصر زمان ودلوقتي، مع تأكيدي على إن زمان كان خرا، بس من نوع مختلف.ناس كتير شاورت على إن في الستينات مصر كانت داخلة في حرب اليمن ضد "الرجعية" السعودية، بينما هي المرة دي داخلة مع "الشقيقة" السعودية.
بس كمان فيه مهزلة تانية، مصر في الستينات كانت داخلة الحرب لنفسها، يعني عشان توسع نفوذها الإقليمي وخلافه. المرة دي مصر داخلة الحرب كسنيد، عشان هي ماشية ورا "الزعيمة" السعودية.
وده إن كان بيقول حاجة فهو بيقول إن مصر اتدهور بيها الحال لأنها بقت دولة تابعة في النظام الإقليمي. والأكثر قسوة وإيلاما إن ده بيشاور على مستقبلنا في ظل الحكم الحالي: إحنا هنبقى العسكري الرخيص للرجعية السعودية وحلفائها. يعني بيستدعونا عشان نحارب معاهم أو نحارب ليهم.
لما مصر، بعد ثورة كبرى، تتحول لعسكري تافه للرجعية العربية، فده شيء مؤلم.. صحيح إحنا مكناش بعيد قوي قبل الثورة (كنا برضه بنساعد أمريكا بطريقة أو بأخرى)، لكن أكيد فيه تدهور مؤلم.
هزيمة الثورة هي السبب. ولا مخرج من هذا إلا بتغيير توازنات القوى المحلية في مصر. ساعتها ممكن نشوف مصر قوة لنصرة الثورة والعدل والحرية في المنطقة.

Tamer Wageeh

5:57 AM