عم الحج اللي في الصورة ده يوناني و إسمه "موراتس"..

Ibra Aref

عم موراتس كان عايش في أمريكا, و ف يوم فجأه حس بوجع في صدره, راح كشف, و إكتشف أنه عنده كانسر في الرئة..و أنه الوقت أتأخر للأسف وقدامه ست شهور ويموت..
.
يا حرام الراجل مصدقش من الصدمة وجرب يكشف عند أكتر من دكتور, لكن للأسف كلهم أكدوله أنه مريض بالسرطان في الرئه, وكلهم أجمعوا أنه هايموت خلال 6-8 شهور..
.
نصحوه أنه خلال الفترة دي يبدأ جلسات كيموثيرابي "كيماوي" علشان الورم ماينتشرش في باقي جسمه..
.
عم موراتس قالهم, مش أنا كده كده ميت ؟ يبقى مالهوش لازمة العلاج والمصاريف.. كده كده هو كان عمره ساعتها حاجه وستين سنة أصلا !
.
وفعلا رجع بيته, وهنا قرر يعيش آخر ست شهور في حياته في بلده الأم "اليونان" وعلشان يتدفن جنب أبوه...
.
سافر اليونان و قعد أول شهرين نايم في السرير ومستني أيامه تخلص..
.
أصحابه القدام "ولاد منطقته" لما عرفوا أنه رجع وتعبان و أيامه معدوده, قرروا كل يوم بعد العصر يتجمعوا ويقعدوا عنده في البيت يرغوا مع بعض..
.
واحده واحده الراجل بقى يقوم من السرير ويخرج يقعد في جنينة قصاد البيت مع أصحابه..
وقرر يسلي نفسه و يجيب شتلات ورد ويزرعها في الجنينة دي ويهتم بيها..
.
فجأه عدوا الست شهور !! الراجل ما ماتش !!
عدوا 8 شهور, برضو لسه عايش !!
قالك أنا شكلي لسه قاعد شوية, راح جاب عمال وقرر يبني دور زيادة فوق البيت وكان بيساعدهم على قد ما يقدر...
.
عم موراتس مات وهو عنده 102 سنه !! يعني تقريبا ضعف عمره لما الدكاترة أجمعوا أنه هايموت بعد ست شهور !
.
عم موراتس لما وصل لسن التسعين رجع أمريكا علشان يقول للدكاترة اللي قالوله أنه هايموت أنه لسه عايش..
.
لقاهم كلهم ماتوا

4:55 PM