بالمناسبة وبكمالة المود المحبط ,,
اثناء حفر وشق طريق الخط الثالث المرحلة الاولي عتبة عباسية,, حصلت انهيارات ارضية متكررة في مناطق باب الشعرية واحمد سعيد وعبده باشا وشارع الجيش
الانهيارات كانت بفعل فاعل
الهيئة المصرية لآدارة وتشغيل مترو الانفاق اقترحت علي الشركة الفرنسية تقليل النفقات بتغيير في خطة الحفر,, والغاء الساند الخرساني اللي بيحمل المحطة بالكامل ,, وتقليل حديد التسليح في الحوائط اللوحية الساندة لهيكل المحطة,,,
والتغيير دا هيوفر 166 مليون جنيه,, مصر هتأخد منهم النص ,, 83 مليون جنيه..
وكانت نتيجة الفساد والعك دا,,, ان الحفار الفرنسي العملاق المستخدم في شق الانفاق تحت الارض,, اتردم وغاص تحت 2600 متر مكعب من التراب,,, وطبعا سابوه,, مقدروش يطلعوه,, وردموا عليه
الحفار تمنه كم بقي؟؟
100 مليون جنيه.,
يعني اللي وفرته هنا ,, صرفته هنا...
المهم مش بس في الحفار..
كل الكوارث اللي بتحصل في مترو العباسية العتبة واللي لسه هتحصل.. وحوار المياه الجوفية دا..
كان بسبب العبقري اللي اقترح عليهم الغاء الساند الخرساني وتقليل حديد التسليح وتوفير 166 مليون جنيه...
يعني المشروع كله ممكن ينهار.. مش عايزين نفتي بقي في تكلفة المشروع بالكامل لآنها مليارات,, بالاضافة لتخريب البنية التحتيتة والمباني والمساكن في منطقة من ازحم مناطق قلب القاهرة وبيسكنها ملايين,...
الكلام دا مش من عندي ,,
المركزي للمحاسبات والمستشار هشام ابو جنينة وقتها اصدر تقرير في غاية الخطورة,, وقعد يزعق يمين وشمال..
ولا حياة لمن تنادي..
والمسئولين لسه موجودين في مناصبهم..
زي بالظبط لما هشام ابو جنينة اصدر تقرير عن فساد الداخلية ومدرج فيه تعدي علي أراضي واموال الدولة بالملايين,,, والرئاسة رفضت اخضاع الداخلية للمركزي للمحاسبات..
خلينا بقي كدا كل يوم مصيبة.. مع العلم ان فيه مصايب صعب علاجها ببيان رئاسي.. او كرنفال دراجات .. او لجنة تقصي حقائق.. او يوم في حب مصر.. او لغد الهام شاهين,,
فيه مصايب بتمس نظام حياة ملايين المصريين المتوسطي ومعدومي الدخل يدوب بيركبوا المواصلة المترو جري راح جاي لشغلهم...
فيه مصايب مينفعش معاها بشرة خير وقوم نادي ع الصعيدي..
لآنك لو ناديت علي الصعيدي من هنا لبكرة .. مش هيلحقك..
هيبقي الحل تقوم تنادي ع السعودي.. يمكن ينجدك..
يارب خليلنا مترو الانفاق يارب...
Shenoda Bebawy
