1- اطلع برة مصر !!
2- اي عيل برشامجي حشاش يجيلك الاستقبال الساعة 4 الصبح عشان عايز فيتامين .. قولّو حاضر عينيا بس اللي عندنا بيحرق شوية .. و اديلو حقنة كحول تحت الجلد
3- ماتفكرش ف الفلوس .. الفلوس مش كل حاجة .. تن تراراران تن تن
4- لما تقول لعيان يصوم 6 ساعات عشان داخل عملية الصبح .. و تكتشف -بالصدفة- ان اهله مأكّلينو محشي قبل العملية بساعة عشان يبقي " شديد كدة و يستحمل العملية " ... خد نفس عميق و دوّر علي اوضة كاتمة للصوت .. و صوّت جامد ,, و ارجع تاني لشغلك
5- استحمل لما تشرح حالة المريض لواحد من اهله .. بعدين ييجي واحد تاني - برضو من اهلو - يسألك عن الحالة .. بعدين واحد تالت و واحد رابع .. ممكن يكونوا مقاطعين بعض يا اخي و متخاصمين مابيكلموش بعض .. مايبقاش ظنك وحش كدة !!
6- اركب مكروباصات كتير .. عشان تتعلم اللغة .. فلما يجيلك الحشاشين و البرشامجية جوا الاستقبال تعرف تتعامل .. لحسن يفتكروك عيل فافي و بتاكل نايتي
7- قيس ضغط العيان
8- قيس ضغط الحاجّة ام العيان .. قبل ما هيا تقولّك يعني .. خليك حسيس !!
9- قيس ضغط اي انسان ممكن يكون لية اي علاقة بالعيان .. من قريب او من بعيد .. عشان تتفادي تلك الجملة المصحوبة بابتسامة سخيفة سمجة " ماتقيسلي الضغط ا دوكتور "
10- ماتحاولش تفهّم العيان اللي جاي الاستقبال الساعة 5صباحا .. عشان عنده احتقان ف زوره .. ان فيه فرق مابين العيادة و استقبال الطواريء .. سيبه .. ده خلقة ربنا برضو
11- حاول تفهّم العيان .. ان لما زوره يكون ملتهب و سخن و عضمه كله بيوجعه .. يخش عيادة الباطنة مش العظام
12-تمالك اعصابك لما تلاقي عيان جاي بيزعّق لانه لسة مخفّش .. و لما تسأله .. تعرف انه مجابش العلاج من اساسه
13- تمالك اعصابك برضو .. لما ست كبيرة تقولّك مش حاقولّك اللي تاعبني منتا داكتور و المفروض تعرف كل حاجة و تبصلك نظرة ازدراء
14- في بلد زي بلدنا ..لو اشتغلت بضمير .. حاتتجازي و حاتشيل قرف الشغل كله علي دماغك .. و ف الاخر حيتقال عليك عبيط
15- لما تبقي لسة متخرج و كلك احلام و امال وردية .. و تلاقي نفسك اترميت ف وحدة صحية ف الارياف بيجيبولك المعيز و البقر تعالجها .. اوعي كرامتك تنقح عليك .. خد نفس عميق و قول ف سرك كالم داون جوني عشر مرات
16- لما يخش عليك ف المستشفي بلطجي عايز يتركبلو كلوكوز .. ركبلو .. لأنه باختصار لو خدك مطواة اخماس ف اسداس .. محدش حيقف جمبك .. انتا كطبيب مصري ملكش تمن ف الحكومة
17- الحكومة مابتتحركش ضد اي بلطجة في مستشفي الا لو فيه تلفيات .. يعني مونيتور اتكسر .. سرير اتكسر .. كدة يعني !!
18- لو انتا لسة طالب ف الكلية .. اوهروب يا ويلد .. و شوفلك اي كلية تانية و اشتري عمرك الله لا يسيئك
19- لو لسا ف ثانوية .. اي حد يقولّك ذاكر و اتعب دلوقتي عشان تدخل طب و ترتاح بعدين .. انفخ ايدك جامد و اظرفو قلم خدامين علي قفاه يعميه .. دي مش قلة ادب بالعكس .. انتا بتعاقبه عشان هوا كداب
20- لو فرحان بالبالطو و بتعلّقه علي دراعك عشان الناس تعرف انك دكتور و فاكر ان دي حاجة حلوة .. بالعكس .. ابسوليوتلي .. دخّل يابني البالطو جوا شنطتك و داري علي بلوتك
21- علّق ورقة علي قميصك انك بتتخصص بعد ما تتخرج .. عشان اي حد يسألك " حاتتخصص امتي يا دوكتور " .. و قد اعذر من انذر
22- العيان المصري الاصيل فيه علاقة عشق بينه و بين السماعة .. حتي لو عنده كسر ف رجله !! .. حط السماعه علي رجله عشان يرتاح و ريّح دماغك
23 - ماتحاولش تقنعه ان السماعة مش حاتفيد بحاجة ف رجله .. مش حايقتنع .. انجز بأة و عدّي يومك
24- لما ام تجيلك بابنها اللي عنده اسهال ..و تبتدي تسألها .. فتطلّعلك كيس اسود فيه لامؤاخذة شخاخ الواد ابو اسهال .. معلش .. استحمل
25- اوهروووووب يا ويلد
26- لما تجيلك ست بتشتكي من تعب ف نفسها و صدرها بعد ما ولدت بنتها ,, عشان اصل "البت و هيا ف بطن امها كان شعرها طويل .. فدخل علي صدر الام " ..ماتحاولش ترد .. معلش
27- اي صايع حشاش عنده جرح عايز يتخيّط و داخل يزعق و يقل ادب .. خيّطه بأتخن خيط عندك .. و من غير بنج كمان عشان يتربي
28- اي بت سايكك عاملة انها مسخسخة و جايبة اهل المنطقة كلها وراها عشان ابوها مش موافق يجوزها "بودي" ابو 17 سنة عشان صايع .. ارزعها الكحول ف مناخيرها وان شوت .. دون رحمة .. منا ناقص اهلك انتي كمان !؟
29- مهنتك مهنة انسانية .. لما تلاقي كل دفعتك ف ثانوي اتجوزوا و خلّفوا و انتا لسة بتبتدي .. ابقي اتجوز الانسانية و كل انسانية و اركب مواصلات بالانسانية
30. اوهروووووووب يا ويييلد
31. تعامل مع اهلك كأنك انسان شفاف .. ماتعرفش عنهم حاجة ولا يعرفوا عنك حاجة .. منتا عمال تجري من شيفت لعيادة لمستوصف عشان تجيب الحد الادني للعيشة الكريمة ف بلدنا وكدا كدا مش هتشوفهم الا طيارى
32.العيب مش فينا .. ولا ف الطب .. العيب فيهم هما (ايف يو نو وات اي مين )
33. افرح بالالف جنية اللي حاتقبضهم و انتا نايب عندك 26 سنة .. الفقراء يدخلون الجنة يا أخي .. خليك مؤمن و ماتتبطّرش ع النعمة
34. هات بالطو بكباسين .. بلاش ابو زراير .. عشان لما البلطجية يهجموا ع المستشفي تعرف تقلعه و تفلّق بسرعة
35. شيء طبيعي ف بلدنا تكون بتتكلم مع اربعين عيان ف نفس ذات الوقت .. هوا ده السيستم .. ماتحاولش تغيّرو عشان حاتتعب و مش حاتوصل لنتيجة
36. ممكن بعد ماتكشف علي عيان و تعملو تحاليل و تديلو علاج تسمع : مستشفي وسخه و دكاتره ولاد كلب " .. درب ودنك ع الجملة دي عشان لما تسمعها ماتتخضش .. عادي
37. الاعلام بيكره الدكاترة جدا .. فاكرين ان كلهم فاتحين عيادات و بيهبشو من كل عيان 300 جنية كشف و هوا ماشي .. ماتركزش انتا بس عشان ماتهيّسش
38 . المريض المصري فاكر ان مرتب الدكتور ف المستشفي الحكومي 13 الف جنية .. سمعتها بودني .. بجد
39. لما أهل العيان يصحّوك الساعة 4 الصبح عشان يسألوك " بابا نفسه ف نجرسكو .. نجيبلو ولا لأ !؟ " .. قولّهم لأ بابا لازملو دلوقتي حالا وجبة لحم مقلقل و حنيز و الا حايجرالو مضاعفات خطيرة .. لفوا البلد لحد ماتجيبوه .. منتا مش حاتتكدر لوحدك يعني !! ..
40 . يابا سافر برة مصر و انفد بجلدك بأة العمر مش بعزقة
فيسبوك
