" رامز واكل الجو . المقلب الواحد 660000 جنيه ! "

Marwa Rabia Morsy

فكره البرنامج هتبقى ان الضيف هيتم دعوته لافتتاح فندق فى دبى .. مع إقامه 3 أيام فـ فندق فخم فى دبى !

بيسافر وبيحضر افتتاح وهمى تقريبا .. وتانى يوم بيقولوله هياخدوه فـ جوله فـ سماء دبى فـ طياره خاصه !

أو بيقولوله ان القندق هيوصلوله بطياره خاصه .. وبيركب الطياره .. وبيحصل قلق عـ ارتفاع 30 ألف قدم .. ودخان وناس بتقع من الطياره وبتاع !

خلينا فى المهم .. لما نيجى نحط ميزانيه البرنامج !
و " المصادر آخر البوست " !

تذاكر سفر رايح جاى وإقامه 3 أيام فى فندق فخم فى دبى .. فـ أى حال من الأحوال مش هتقل عن 25 الف جنيه فـ 30 ضيف = 750 ألف جنيه !

الشركه اللى اتعاقد معاها رامز عشان تنفذ المقلب هى شركه " إسكاى دايف " فـ دبى .. التعاقد تم عـ 150 ألف جنيه فى الحلقه فـ 30 حلقه = 4 ونص مليون جنيه !!

نيجى بقى للضيوف ..

طريقه الشغل فى برامج المقالب بتتم كالتالى .. أولا الفنان بيقبض عـ حسب نجوميته .. وعـ حسب هو عارف إنه فى مقلب ولا لأ !

بمعنى ان فـ ضيوف بتبقى عارفه انه مقلب من قبلها .. بحيث ان أجره يبقى أقل وميعملش مشاكل وقواضى .. لان الناس دى بتبقى مناخيرها فى السما شوية .. والدليل اللى حصل مع آثار الحكيم السنه اللى فاتت واللى اعترضت عـ الفلوس وطلبت أكتر من اللى كانوا متفقين عليه .. والسنادى نفس الموقف حصل مع صافيناز .. واللى اتصابت فى المقلب وطلبت مبلغ أكبر من اللى اتفقوا عليه !

بحسب الفلوس اللى تم الاعلان عنها السنه اللى فاتت فـ برنامج " قرش البحر " .. فـ الضيوف العرب بيقبضوا بالدولار .. واقل آجر مش أقل من 20 ألف دولار .. وصافيناز خدت 70 ألف دولار لوحدها !! .. والغلبان اللى فـ المصريين مش بياخد اقل من 50 ألف جنيه .. والسنادى فـ 6 ضيوف عرب .. وضيفه عالميه !
" كل ده فـ المصادر "

هنعمل متوسط للمصريين 100 ألف مع إنهم قليل فـ 23 ضيف مصرى = 2 مليون و300 ألف جنيه !

هنعمل متوسط للعرب 50 ألف دولار " اضرب فـ سبعه ونص بالمصرى " فـ 6 ضيوف = 2 مليون و250 ألف جنيه !

مع العلم إن جورج وسوف لوحده واخد 180 ألف دولار !!

الضيفه العالميه باريس هيلتون .. أعلنوا انها كانت رافضه عرض البرنامج .. ووافقت عـ العرض بعد ما خدت 250 ألف دولار = 2 ونص مليون جنيه !!

أجر رامز جلال السنه اللى فاتت كان 4 مليون و200 ألف جنيه .. والسنادى نقول خد 5 مليون بالميت !

مصاريف طاقم العمل السنه اللى فاتت عدى الـ3 مليون جنيه بمعدل 100 ألف جنيه فى الحلقه .. هنقول 3 مليون جنيه مش مهم !

لو حسبت الفلوس دى هتلاقيهم تقريبا 20 مليون و50 ألف .. وهو الرقم اللى أعلنته Mbc مصر كميزانيه للبرنامج فعلا بس بدون تفاصيل !

لما تيجى تحسبها هتلاقى ان المقلب الواحد واقف بـ تقريبا 660 ألف جنيه مقلب بأكتر من نص مليون جنيه .. تخيل واحد بيعمل مقلب فى واحد صاحبه بنص مليون جنيه عشان احنا نتفرج عليهم ونضحك !!

هو ده مش إهدار مال عام لانه مال خاص وهيكسبوا أضعافه كمان !!
..بس دى مضاجعه حرفيه لنفسياتنا يا جماعه !

المصادر :
الشركه اللى أجرت الطياره واللى بينطوا بالبراشوت وفيها الأسعار
http://www.skydivedubai.ae/

أجر باريس هيلتون وجورج وسوف
http://www.alraipress.com/news11105.html

أجر صافيناز 10 أضعاف أجرها فى أى برنامج !
http://osnnews.com/art/154895.html

أجور الفنانين السنه اللى فاتت
http://www.filfan.com/news/details/42126

وده مقال عموما عن البرنامج والميزانيه
http://www.alanba.com.kw/…/arabic-interna…/565241/13-06-20

7:46 AM