إمبارح رحت أنا وجوزي لـ "دار الافتاء المصرية" عشان الشيخ يقنعني إن الحجاب فريضة...
المهم دخلنا وأخدنا دور، وما استنناش كتير يادوبك دقيقتين، ودخلنا لشيخ اسمه سيد شلتوت... المهم دخلنا وسألته إني عايزه آية قرآنية أو حديث صحيح يقول إنه الحجاب أو غطاء الرأس فرض...
قال لي إنه فرض بإجماع العلماء.... قولت له طيب أنا عايزه آية قرانية تقدر تفرض فرض بالإجماع أو إنه ثالث مصدر أمشي بيه بعد القران والسنة.... فقال لي قوله تعالى: (ومن يشاقق الرسول من بعد ما تبين له الهدى ويتبع غير سبيل المؤمنين نوله ما تولى و نصله جهنم)... قولت له طيب ده مالوش دعوة بالإجماع، وربنا لو كان عاوزنا نفرض فروض بالإجماع كان جابها واضحة، ده غير فروض ربنا الأركان الخمسة كلها جاية واضحة و صريحة في القرآن... قال لي: طب ما طريقة الصلاه مش جاية في القرآن... قولت له: طريقة الصلاة متواترة... قال لي: لا مش متواترة، والحجاب فريضة في الإسلام بالإجماع، وما فيش نقاش في الموضوع ده... قولت له: إذا كان الإمام أحمد بن حنبل قال "من يدعي الإجماع فقد كذب، فما يدريه لعلهم اختلفوا"، والدكتور سعد الدين الهلالي قال إنه الإجماع في حكم القانون وليس الدين... قال لي: مش فاهم حاجة وفي كتير في #الأزهر اتلحسوا في دماغهم وبيقولوا إنه حتى وجود الله فيه شك، واللي إنتي بتعمليه ده اسمه شغب، فبلاش مشاغبة، والحجاب فريضة، ومش هتناقش في الموضوع ده... قولت ل:ه مش عايز تناقشني ليه وتقنعني بأدلة؟!... قال لي: عشان إنتي جاهلة ولكى عذاب جهنم باذن الله!!!!... قولت له: لو جالك حد ملحد أو مش مسلم بتناقشه بالطريقة دي؟!... قال لي: آه وبيدخل في الإسلام وهو مبسوط كمان!!
كل ده وجوزي عمال بيهدي في الشيخ ومستغرب إزاي شيخ فى دار الإفتاء يتكلم بالطريقة دي... وجوزي بيقوله: إزاي يا شيخنا بتتكلم كده، بقى الرسول كان بيعمل كده!... والشيخ عمال يزعق وأنا كنت قمت عشان أمشي، رُحت قايلة لجوزي يالا ما تتعبش نفسك دول ما بيقتدوش بطريقة الرسول... ولما مشيت، بيزعق الشيخ وبدأ يهدد إنه من حقه يسجني سنتين ازدراء في الأديان، وأنا وجوزي مستغربين من طريقته الهمجية دي وسيبناه و مشينا... وقال لي: معلش، هاوديكي لشيخ تاني أحسن منه تتناقشي معاه لأن الشيخ ده لا يُمثل الإسلام... مع العلم إنه جوزي مقتنع إنه الحجاب فريضة ووقف جنبي لأني لا اتكلمت مع الشيخ وحش ولا بعصبية... أنا كنت بتناقش معاه بالعقل... وكان شايف إزاي الشيخ متعصب وعمال يشتمني ويقولي إنتي جاهلة، وبيدعى عليا بإني ادخل جهنم خالدة فيها وبيهددني بالسجن لمجرد إني رايحاله عشان يقنعني إنه الحجاب فرض من ربنا.
ريهام
