جروب من 6 افراد وصلنا مطار ناريتا بطوكيو بعد ترانزيت في ابو ظبي علي طيران الاتحاد.. رحلة 16 ساعة عقلك مبطلش لحظة تفكير في اللي انت سايبه وسايب قلبك معاه في مصر... وصلنا المطار واقفين في طابور الجوازات علشان نختم ونعدي نستني الشنط.. موظف الجوازات في اجراء لم يتعدي دقيقه حرفيا لقيته ختم الباصبور وخد بصمتي وصورتي وطبع كارنية ممغنط بتاع الاقامة لتلات سنين قادمه وبيديهولي... للحظة مستوعبتش ومر في خيالي مشوار مجمع التحرير وصورة مدام تفيده وهي ناحية الختم وبتقولك فوت علينا بكره ومدام اعتماد وهي بتفطر ومش معبراك حتي بشقه فول وانت واقف عرقان قدامها من الحر وأستاذ مصيلحي وهو بيقفلها في وشك امضاءات ناقصة وتصوير ورق مالوش لازمه وطلوع ونزول لحد متكرمش العشين جنيه وتديهاله... الموظف الياباني فوقني من شريط الذكريات وهو بيتمنالي اقامة سعيدة في اليابان وبينده علي اللي بعدي... خدت الكارنية ومشيت مع بقيت الجروب المكون من سته افراد ووصلنا لسير الشنط... وهناك لقينا منظر غريب وصادم جدا... لقينا شنطنا السته محطوطة جمب بعض زي ما الصورة موضحة.. يعني مفيش وقوف علي السير وعامل ملزق عمال يشد الترولي من ايدك علشان التبس.. بس للاسف لقينا يافطة خشب مكتوب عليها اسم واحد من السته وموظف جايلنا بعتذر ان شنطة الزميل ده تخلفت في رحلة بكرة في مطار ابوظبي وانهم هايستلموها ويوصلوها بكرة مكان اقامته وخلاه يمضي علي ورقة وهو واقف وراح مديله ظرف فيه 5000 ين يعني حوالي 400 جنيه مصري اعتذار منهم لحد مشنطتة تيجي بكرة علشان لو حب يشتري حاجة.. بصينا لبعض وبعد مل كان صعبان علينا كله في سره بيقول يابن المحظوظة وعمالين ندور علي حته نخبي شنطنا ونقول مجتش. طبعا رجعتلي فقرة الذكريات وافتكرت الشنط لما بتضيع خالص مش بس اتاخرت يوم بيتعمل في صاحبها ايه...يا تري هانعيش يوم في بلدنا نحس فيه بالادمية والانسانية ولا ربنا هايفضل مسلط علينا مدام تفيدة واعتماد وأستاذ مصيلحي واللي مشغلينهم يعذبو فينا ويقنعونا ان شرب المر بقي بطعم العسل!!!
