الصراع الحضاري بين الممبار والمحشي من جانب والكريبات والسوتيه من جانب اخر !!

Hossam Mokhtar

المشكلة الحقيقه ان انتو مقتنعين بالكوردن بلو والوايت سوس والكريبات والبانيه والسوتيه وشايفنهم اسلوب حياة

واحنا برضه متماسكين بحقنا الغريزي ف الممبار والمحشي والفتة والطواجن

الابتزاز اللي انتو بتمارسوه علينا مؤخرا والاتهامات بالرجعيه وعدم مواكبه العصر مش هيجيب نتيجه

وهنفضل ناكل طاجن الباميه البايت مع رغيف متقمر وجنبهم طرشي بلدي وعمرنا ما هنقتنع بالسوبر سوبريمو
لان ببساطه
هذا ما وجدنا عليه ابائنا

وكمان انتو ليه مش عايز تفهمو ان المحشي جزء مهم ومكون رئيسي ف شخصيه مصر
احنا حشينا كل حاجه
بنحشي الرز ف البتنجان والفريك ف الحمام والدين ف السياسه والفهلوه ف الشغل

وبعد كل ده تيجي واحده بمنتهي الوقاحه والصفاقه تقولك ان مبعرفش اعمل خلطه المحشي او هو ليه مفيش ماكنه تلف المحشي

كيوت انتي كده يعني
حسيت بانوثتك انا !!!

وعن الممبار حدث ولا حرج
بأبي انت وأمي يا طبق الممبار
شخصيا حاولت ارتبط كتير لكن للاسف ديما العلاقه كانت بتنتهي اول ما تيجي سيره الغالي
وتلاقي البنت من دول بتقولك يععععععع
لا الممبار ده تبقي تاكله عند امك

اه امك انت

وبعيدا عن شتيمه الامهات
صدقوني الموضوع محتاج شويه اراده
الرجاله لازم يكون ليهم موقف موحد ... لنقاتل جنبا الي جنب من جديد وليبقي كل ف مكانه

مش هنسمح للتاريخ انه يكتب عننا ان احنا الجيل اللي ضيع شخصيه مصر وقتل المطبخ بتاعها

لعشرات الاجيال قدس ابناء هذا الوطن طواجن العكاوي ولحمه الراس واللسان متجيش انت يا فسل وترضخ للمدام وتوافق تتغدا بانيني الموزريلا عشان هي بتحب الايطاليان كيتشن

انت عارف اصلا يعني ايه بانيني دي عشان تاكلها
ولا هو اي اسم غريب وخلاص

يا جماعه ادركو اللحظه الفارقه
فهمو البنات ان الاكلات اللي بيتكلمو فيها دي عامله زي تويتات البوب
شكلها حلو بس مش مفهومه

اتمسكو بعادتنا وتقاليدنا
حبو المسقعه وقدسوها وارسموها ع جدران المعابد
تطهرو من خطاياكم بالملوخيه
اجعلو الكوارع دستور عملا ونضال

3:22 AM