Mostafa Hashem
تماما و كلامه علشان تفهم منه كلمه تقعد نص ساعه .. أنا قلت ادخله اسحبله تحاليل و اشوف وضعه ايه .. أنا يادوبك دخلته الاستقبال لقيت الواد اللى كان معاه ده مشى و بقى معايا راجل مشلول كلامه اغلبه مش مفهوم و معهوش اهل .. أنا كملت شغلى و الراجل طلع عنده تسمم فى الدم ده غير الشلل اللى عنده طبعا و قرح الفراش اللي ملهاش اول من اخر و ده محتاج يخش عنايه الباطنه .. دكتوره الباطنه قالتلى مش هاخد حاله معهاش اهلها قعدت اقلها ده بنى ادم و احنا ممكن نبقى زيه و ده واجبنا ولا حياه لمن تنادى .. طبعا بلغت المدير كان رأيه انى أنا اللى غلطان علشان دخلت حاله من غير أهلها و بعد ما كلمته أكتر من مره الحل اللى قالهولى اننا نلبس الحاله لمستشفى تانيه .. المهم أنا كلمت النجده و النقطه اللى فى المستشفى و أمن المستشفى و دور المسنين كلهم فكسولى و كل واحد يقولى حجه و منهم اللى قالى حلول جهنميه زى الظابط اللى فى النقطه اللى قالى هات عربيه بسواق و ارميه قدام البيت اللى مكتوب قى البطاقه ( اللى انا خدتها من الواد اللى كان جايبه ) .. المهم لما ضاقت بيا الدنيا كلمت جمعيه رساله قلتلهم يجوا ياخدوه لمستشفى المنشاوى العام ( و أنا كنت كلمت حد يعرف مسئول هناك قال انه هياخده و يدخله العنايه ) .. المهم الشباب بتوع رساله جم خدوه مستشفى المنشاوى .. و كلمونى من هناك قالولى ان فيه تعنت جامد و ان دكتوره العنايه قالت اه مش محتاج عنايه ( ده طبعا اللى هو انت لو جبت كلب فى الشارع هيقول ان ديه حاله عنايه ) .. المهم أنا قلتلهم استحملوا شويه بس و حاولوا معاهم و بعد شويه قالولى انهم وافقوا انهم يدخلوه العنايه و خدوا بطاقه ولد من رساله ( عنده 17 سنه ) على اساس انه المرافق للحاله و الممرضه قالتله لازم يكون فى صله قرابه ما بينكوا و قالتله اكتب انه يقربلك قلها ماشى فكتبت ان الراجل ده يبقى خاله .. الحكايه مخلصتش لسه .. تانى يوم الصبح لقيت بتوع رساله بيكلمونى بيقولوا ان الراجل مات ( اللى هو مش محتاج عنايه ) و مش كده و بس ان المستشفى هتعمل محضر فى الولد اللى دخله المستشفى لانه ادعى انه قريبه .. انا قلت اروح للراجل المسئول اللى صاحبى كان مكلمه اللى قال انه هيدخله يشوفلى حل فى الموضوع بتاع الولد ده .. روحت لقيته راجل من اوسخ ما يكون قالى انه هيعمل للولد محضر و أنا عمال بقوله ده انت عارف انه بيساعد الراجل اللى معهوش اهل ده قالى مليش دعوه .. المهم انى قعدت ساعات ألف عليهم علشان ميعملوش محضر فى الولد ده لحد ما واحد ابن حلال وافق و قالى أنا هكتب إن الراجل مجهول و هطلع اسم الولد من الموضوع .. يعنى الراجل مات من اهمال الدكاتره و مش بس كده عايزين يعملوا محضر للناس اللى ساعدته .. على فكره الراجل ده لحد ما مات كان واعى لكل اللى بيحصله و شايف الناس و هى رامياه و مفيش فى قلوبها اى ذره رحمه .. بعض الجمل اللى قدرت افهما منه ( متسبنيش _ أنا عايز أموت _ كل الناس سابتنى ) .. يعنى الراجل كان ميت نفسيا قبل ما يموت جسديا .. الموضوع فيه تفاصيل كتير قوى بس حسبى الله و نعم الوكيل فى كل اللى قصر مع الراجل ده و ان شاء الله هتتردله باذن الله
