مافيا التعليم فى مصر بقيادة نرمين إسماعيل

Sherif Hegazy

تخيل نفسك فى شغلك الصبح و تعرف ان مدرسة ابنك فيها خناقات و ناس بتقول ان المدرسه هتقفل بعد شهرين بجميع مراحلها !
الكلام ده حصل يوم الاربعاء 25/3/ 2015 فى مدرسة "Private Deutsche Schule Kairo " فى التجمع الخامس.و اتصلنا بمدرسة ابنى ( المانية الجنسية ) و كانت فى حالة ذهول و اكدت ان المدرسه فعلا هتقفل وإن يوم 15/5/2015 هو اخر يوم دراسي لجميع المراحل و انها مش مصدقه ان فى بلد فى العالم ممكن يحصل فيها كده .
ولأن المدرسة " المملوكه لنرمين اسماعيل حريصه على مستقبل الطلبه خدت القرار الغلق بعد ان تأكدت تماماً ان كل المدارس الالمانيه قفلت باب التقدم .
المدرسه دعت اولياء الامور للاجتماع تانى يوم و بحث المشكله.. طبعا الدكتورة المحترمه بعتت واحد مكانها و قدم حل من اتنين :
1. نقل الطلبه لمدرسة Rehab Future German School ( مدرسة غير دولية ) و المملوكه لدينا اسماعيل ( اخت نرمين اسماعيل ) و هى طبعا اقل بكتير من المستوى الحالى لمدرستنا !!
2. تسهيل نقل الطلبه الى اى مدرسه تابعه لنرمين اسماعيل ( امريكيه او انجليزيه ) !!
يعنى من الاخر نقل الزباين ليها أو لأختها .. المهم المصلحه.
خلال الاجتماع عرفنا انها امتنعت عن سداد ايجار المدرسه بقالها سنتين و ان مالك المبانى ( كويتى الجنسيه ) رفع قضيه بطردها و اتحكم له بالتميكن .. علماً بأنها لمت كل المصاريف بما فيها مصاريف العام الجديد من المتقدمين للسنه الجايه ( 120 طالب ) كمان و طبعا مفيش مدرسه هتقبلهم غيرها او مدرسة اختها!
طبعا طلبنا الشرطه و عملنا محضر اثبات حالة ... مستقبل اولادنا مش لعبه و اسم والدها المحترم ( المشير أحمد اسماعيل ) اللى بتستغله و بتعتبر نفسها فوق القانون مش هيمنعنا من ملاحقتها.
مش عايز اقنع نفسي ان حقى و حق الاولاد ممكن يضيع بسبب نفوذها .
هنتوجه لوزير التعليم يوم الاحد 29/3 لعمل اللازم تجاها و لن نقبل اقل من نقل اولادنا الى مدارس المانيه معتمده دولياً و مش هنسيب وسيله إعلاميه الا لما هنفضحها و اللى لسه مستمرين فى مدارسها لازم يأمنو نفسهم كويس جداً .
تانى مستقبل أولادنا مش لعبه ..